အထူးအထွေတော့မဟုတ်ပါဘူး တစ်ခုခု ချရေးဖို့စဉ်းစားတဲ့အခါတိုင်း ခင်ဗျားမျက်နှာကို မြင်ယောင်လိုက်တာပါပဲ
ရွာချလွန်းနေတဲ့ မိုးပေမယ့် ခင်ဗျား အိမ်ပြန်ရောက်နေမှာပါ
နွေးနွေးထွေးထွေးရှိနေမှာပါ
အအေးမိနေမလား ဖျားနာနေမလားဆိုတဲ့ အတွေးတွေအတွက် ခင်ဗျားမှာ ကျွန်တော်မဟုတ်တဲ့ ကျွန်တော့ထက်တောင်စိတ်ပူတတ်တဲ့ အသိမိတ်ဆွေတွေ ရှိလို့ စိတ်ချရပါတယ် ( ဒါမှမဟုတ် ကျွန်တော် အဲဒီလို အားတင်းရပါတယ် )
သိပ်လွမ်းပါတယ်လို့ အော်ဟစ်လိုက်ဖို့ ခင်ဗျားမကြားအောင် အတော်အားတင်းရတယ် မျက်လုံးထဲမှာဝေ့ပြီး ပူစပ်လာတဲ့အချိန်တွေမှာလည်း အတော်ကို ထိန်းချုပ်ရတယ်
ကျွန်တော် စိတ်မပူဘူး လို့ပဲထားလိုက်နော် ကျွန်တော်က စိတ်အရမ်းမာတယ်လို့ပဲ တွေးလိုက်နော် ကျွန်တော်ဟာ ခင်ဗျားနဲ့ key မကိုက်တဲ့ အသံဆိုးဆိုးဂစ်တာအစုတ်အပြတ်တစ်လုံးလို့ မှတ်ယူပစ်လိုက်နော်။
ခေါ်ဆိုရင်လည်း black list မလုပ်ထားပေမယ့် လက်ခံဖြေဆိုမှာမဟုတ်တဲ့ သေချာနေခြင်းတွေကို ကျွန်တော်လက်ခံလိုက်ရတယ်။ သေရာပါခြင်း ဒဏ်ရာတွေကို တတ်နိုင်သလောက်ဆွဲနုတ်ပေမယ့် မရဘူး။
ညဘက်ကျ ခင်ဗျားက ကျွန်တော့အိပ်မက်ထဲလာဦးမှာ။မနက်ကျ ခင်ဗျားမဟုတ်သလို၊ ကျွန်တော်ကလည်း ခင်ဗျားမရှိတာ မဟုတ်သလို ဟန်ဆောင်နေရတဲ့ လက်တွေ့ဘဝထဲ ကျွန်တော် အရှင်လတ်လတ်ကျန်ခဲ့ရဦးမှာ...။
တကယ်ဆို ကျွန်တော့ဘက်က ခေါ်ဆိုသင့်တာ၊မျက်နှာပြောင်တိုက်ပြီး တစ်ရက်လောက် အားရင်တွေ့ရအောင်လို့ ပြောသင့်တာ။
ကျွန်တော် ရင်မဆိုင်ရဲတော့လို့ကျွန်တော့ကို အပြစ်တင်ပါ။ ကျွန်တော့အတွက် ဘာမှ မကျန်ရင်တောင် နာကြည်းသွားတာပဲဖြစ်ဖြစ် တစ်ခုခု ကျန်စေချင်တယ်လေ။
ရုပ်ရှင်ဇာတ်ကားတွေထဲကလို ရုတ်တရက် ကျွန်တော်သေခါနီးအချိန်မှာ လာရောက်ကယ်တင်တာမျိုးလည်း တောင့်တမိတာပဲ။ ကျွန်တော့ ကုပ်ပိုးကို ဖျစ်ညှစ်ဆော့ကစားပြီးတော့ ကယ်တင်ပါ။ ကျွန်တော့ရင်ခွင်ထဲ ခဏထိုင်နေပြီး ဖုန်းထဲကပုံတွေကို snap seed နဲ့ စိတ်လိုလက်ရပြင်နေပါ။ ဖုန်းထဲက ဓာတ်ပုံလေးကို ကယ်တင်သလို ကျွန်တော့ကို ကယ်တင်ပါ။ ဆက်ရေရွတ်နေရင်လည်း ခင်ဗျား ကျွန်တော့ကို စိတ်တိုလာတော့မယ် မဟုတ်လား...။
ကျွန်တော်လည်း ရုပ်ရှင်ဇာတ်ကားထဲကလို ငါက မင်းကို စောက်ရမ်း ချစ်တာ လို့ ပြောချင်တာပါ။နှစ်အနည်းငယ်ကြာပြီးသော် ဆိုတဲ့ စာတမ်းနောက်မှာ ကျွန်တော်က လေယာဉ်ပျံကြီးပေါ်က ဆင်းလာပြီး ခင်ဗျားနဲ့တွေ့ဆုံချင်တာပါ။ကျွန်တော် မည်သို့လုပ်လိုက်တယ်မသိဘဲ ပိုက်ဆံတွေ အရမ်းချမ်းသာပြီး ခင်ဗျားမျက်မှန်လေးရဲ့ ပိုင်ဆိုင်နိုင်သမျှမြင်ကွင်းတွေအကုန်လုံးကို ကျွန်တော်ဝယ်ပစ်ချင်တာပါ။
တစ်ခါတလေကျတော့လည်း ခင်ဗျားများ တစ်နေရာရာကနေ ကျွန်တော့ကို ကျွန်တော်မသိအောင် လာကြည့်နေမလားလို့တွေးတဲ့အခါ
ခင်ဗျားလည်း ကျွန်တော့ကို သေလုမတတ်သတိရနေမယ်လို့ တွေးမိတဲ့အခါ (ကိုယ့်ကိုယ်ကိုအထင်ကြီးပစ်တာတွေလေ)ကျွန်တော် အဆင်မပြေဘူး။ ကျွန်တော်သိပ်ကိုနာကျင်တယ်။ကျွန်တော် လဲပြိုတယ်။
အဲဒီလိုနဲ့ ခင်ဗျားက အိပ်မက်ထဲမှာ ကျွန်တော့ကို ရယ်ပါတယ်။ကျွန်တော်က ခင်ဗျားရှေ့မှာ ငိုပါတယ်
No comments:
Post a Comment